Заменик министерот за образование и наука Спиро Ристовски, заедно со градоначалникот на општина Кисела Вода Билјана Беличанец-Алексиќ денес го посетија ООУ “Кирил Пејчиновиќ”, каде имаа можност да се уверат во позитивно влијание од имплементирањето на Кембриџ програмата во наставата.
Четвртоодделенците од ова училиште со својата наставничка Бети Спасовска, на некласичен начин, преку опити учеа за промената на агрегатната состојба, тема предвидена со наставната програма по предметот природни науки.
Топејќи чоколадо и маргарин, главните состојки за една торта, тие, низ пример кој никогаш нема да го заборават, имаа можност да ја следат промената на агрегатните состојби и сами да извлечат заклучоци за поставените прашања. Посебно беше видлива работната и ведра атмосфера и ангажираноста на сите ученици во експериментите што ги спроведуваа со својата наставничка.
-Бевме сведоци на еден од можеби најкреативните часови во однос на имплементирањето на новите наставни програми. Методологијата и начинот на кој што се спроведуваше овој час, е на еден начин, една од главните реформи која е содржана во новите наставни програм и новите учебници , а тоа е развојот на креативноста, на инвентивноста и секако, полесното совладување на целокупната материја од страна на учениците со помош на новите наставни програми и секако, со најклучната алка во целиот процес, а тоа е наставникот-изјави заменик министерот за образование и наука Спиро Ристовски, честитајќи и на наставничката Бети Спасовска и истакнувајќи дека таа е пример како еден наставник на креативен начин успева да го задржи вниманието кај учениците и да го пренесе целокупното нејзино знаење.
Градоначалникот Билјана Беличанец-Алексиќ во својата комуникација со учениците имаше можност да се увери во нивното логично размислување и критичкото мислење, но и за тоа колку овој начин на изведување на наставата им е попривлечен децата, па со тоа и усвојување на знаењето е полесно, што е една од главните цели на Кембриџ програмата.
– Јас сум задоволен од начинот на кој се имплементира целокупната оваа реформа. Како Влада ќе продолжиме и натаму. За следната година се најавени останатите одделенија од 7 до 9 одделение од основното образование. Нормално како и за секоја друга активност на почеток има извесни потешкотии, но јас сум убеден дека долгорочниот ефект од оваа реформа Република Македонија за 10-ина години отсега ќе го доживее многу позитивно, рече Ристовски.
Изрази благодарност до сите наставници во Република Македонија бидејќи, како што истакна, клучна е улогата на македонскиот наставник во спроведувањето на сите активности кои се поврзани со зголемување на квалитетот на образование. – Ние како ресорно Министерство и како Влада ќе продолжиме и понатака цврсто да ги поддржуваме македонските наставници и заеднички да чекориме кон систем на многу поквалитетно образование за децата во Република Македонија, рече Ристовски.
