Претседателот на Советот на општина Кисела Вода Трајче Донев, државниот секретар во Министерството за труд и социјална политика Енвер Хусеин и претседателот на “Мобилност Македонија” Бранимир Јовановски, денес свечено ја пресекоа лентата и со тоа го пуштија во употреба игралиштето за деца со посебни потреби во општина Кисела Вода. Настанот е дел од случувањата по повод одбележувањето на патронатот на оваа општина.
– Големо е задоволството што денес, на денот кога општина Кисела Вода го прославува својот патронат, мноштвото настани кои се планирани и ќе се случуваат во знак на неговото одбележување, ќе го збогатиме со уште едно случување. Имено, како што најавивме пред два месеца, кога на ова место започнаа градежни активности, денес, го отвораме новоизграденото детско игралиште кое им е наменето на сите дечиња, но пред се, на дечињата со посебни потреби. Како што можете да забележите, се работи за простор од 280 квадратни метри на кој, врз специјална подлога што не го ограничува движењето, се поставени најмодерни реквизити за игра чија примена ја поттикнува инклузијата на децата со посебни потреби. Исто така, се создаваат и услови за нивен развој и социјализација, бидејќи игралиштето можат да го користат и сите останати деца. Општина Кисела Вода, од својот буџет за изградбата на ова игралиште издвои 1.5 милион денари. Реквизитите ги обезбеди Министерството за труд и социјална политика преку Националниот сојуз на лицата со телесен инвалидитет “Мобилност-Македонија”, за што, во овој миг, би сакал да упатам голема благодарност до нив-истакна Претседателот на Советот на општина Кисела Вода Трајче Донев.
-Заедно со другите општини и со Националниот сојуз на лицата со телесен инвалидитет “Мобилност-Македонија”, досега имаме инвестирано во девет вакви инклузивни игралишта. Ова, кое денес го отвораме е осмо. Од страна на општина Кисела Вода, за него, беше инвестирано околу подлогата и локацијата, од буџетот на Министерството за труд и социјална политика беа издвоени 500 000 денари, употребени за овие реквизити. Во текот на 2015, имаме доставено информација до Владата за отворање на нови три игралишта од овој тип -изјави Енвер Хусеин, државен секретар во Министерство за труд и социјална политика.
-Веќе трета година Националниот сојуз на лицата со телесен инвалидитет “Мобилност-Македонија” во соработка со Министерството за труд и социјална политика, спроведува проект на инклузивни детски игралишта. Нашата цел е младите дечиња со попреченост, уште од најрана возраст , да играат заедно со другите дечиња и да се учат на различностите меѓу нив. Втората поента е подигнување на јавната свест дека дечињата со инвалидитет не се ниту болни, ниту неспособни, туку само им треба поддршка од општеството и од државата за да можат да се вклучат во сите пори на општеството-изјави Бранимир Јовановски , претседател на Националниот сојуз на лицата со телесен инвалидитет “Мобилност-Македонија”.
Игралиштето е со површина од 280 метри квадратни од кои 200 метри се за игралиште, а останатиот дел е патека со ширина од 2.4 метри. Игралиштето е опремено со детски реквизити поставени на специјален под кој не го ограничува движењето, клупи, корпи за отпадоци и осветлување.
Веднаш по отворањето голем број на дечиња започнаа со игра на игралиштето, додека на улицата до нив се случуваше цветно дефиле, предводено од градскиот пајтон и вовче, кое започна пред ООУ “Кирил Пејчиновиќ” и финализираше со културно-уметничка програма во паркот ,, Шопен” од страна на учесниците во дефилето.
