25 Март е само уште еден од деновите кога општеството треба да зборува гласно за потребите на лицата со церебрална парализа, а грижата и поддршката треба да бидат секојдневни. Ова беше заедничкиот заклучок од настанот што го организираше општина Кисела Вода за лицата со церебрална парализа по повод интернационалниот ден за подигање на свеста за церебрална парализа.
На средбата, овие деца и нивните родители преку дружба и забава со градоначалникот Ѓорѓиевски уште еднаш проговорија за потребата од надминување на општествените бариери и можноста за нивна поголема вклученост во социјалните случувања.
На настанот присуствуваше и директорот на ЈУ Меѓуопштински центар за социјални работи на град Скопје, Лиридон Бафтији со кој се дискутираше и за обезбедувањето на поголема институционална поддршка и кој ја изрази својата подготвеност за интензивирање на соработката со цел унапредување на условите за лицата со попреченост.
Од лицата со церебрална парализа и градоначалникот Ѓорѓиевски и директорот Бафтији добија лично изработен подарок.
-Оваа слика, од денес ќе стои во мојот кабинет, изјави градоначалникот Ѓорѓиевски.
Инаку, од јули минатата година, тој во населбата Расадник отвори клуб за дружба, социјализација и едукација на децата со церебрална парализа. Се работи за специјално прилагоден и целосно опремен простор, кој овозможува нивно вклучување во активности надвор од домот. За користењето на клубот, тие не плаќаат никаков надоместок. И за користење на просторот, и за тековните трошоци за користење се грижи лично градоначалникот Ѓорѓиевски од свои сопствени средства. Воедно, тој е нивен чест гостин таму.
Инаку, во насока на обезбедување на еднакви можности за сите, во Општина Кисела Вода вчера беше отворен Нега Центар за обезбедување на помош во домашни услови за повозрасните и лицата со попреченост. Паралелно, за нив е обезбеден и бесплатен транспорт за вршење на некаква здравствена или административна услуга. Од минатата година на територија на Кисела Вода функционира и Дневен центар за окупациона терапија за лица со попреченост над 18 години, отворена е првата целосно инклузивна детска градинка и целосно инклузивно основно училиште. Од минатата недела, Кисела Вода е и првата општина која вработи лице со Даунов синдром.
