Согласно Законот за квалитет на амбиентниот воздух, на барање на Владата на Република Македонија и Министерството за здравство, Општина Кисела Вода, по добиеното известување од страна на Министерството за животна средина дека квалитетот на воздухот последователно два дена е надминат над законски пропишаниот миниумум, односно над 188 μg/m3 на мерните станици во Карпош, Центар и Ректорат, објавува дека стапуваат на сила следните препораки и мерки:
-Сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар. Препорака до сите правни субјекти (работодавци) да го реорганизираат работното време и лицата кои работат на отворено да работат од 11:00 до 17:00 часот. Да не се организираат спортски натпревари и други културни манифестации на отворено. Известуваме дека ќе се обезбедат услови за зголемени активности на службите за итна медицинска помош, домашна посета и патронажна служба.
Во рамки на функционирањето на службите на локалната самоуправа, известуваме дека ќе се намали (до 50%) употребата на службените возила, а ќе се обезбеди и ограничување на работите на градежните објекти. Во соработка со Министерството за труд и социјална политика и Црвениот крст, како и Здравствениот дом, ќе се обезбедат прифатилишта за сместување на бездомници, а на старите и осамени лица ќе им се даде поддршка преку организирани посети.
Ја известуваме јавноста и дека Државниот инспекторат за животна средина ќе започне со вршење на зачестена контрола на Инсталациите кои што поседуваат А – ИСКЗ дозвола, истиот ќе спроведе контролни мерења на емисиите на загадувачки супстанции во амбиенталниот воздух со акредитирана лабораторија, со цел да се утврди дали се применуваат пропишаните услови/мерки во Дозволата по однос на емисиите во воздух.
Министерството за животна средина и просторно планирање, пак, ќе подготви и достави препорака до Инсталациите коишто поседуваат А – ИСКЗ дозвола, за намалување на капацитетот на производство (до 50 %) со што од оваа мерка ќе бидат исклучени инсталациите кои што произведуваат топлинска или електрична енергија.
Воедно, Општина Кисела Вода ќе ги почитува и сите останати краткорочни и долгорочни мерки изготвени од Владата на Републка Македонија.
