На заедничка средба со бизнис заедницата од општина Кисела Вода, градоначалникот Орце Ѓорѓиевски денес ги претстави двата капитални проекти за изградба на фекална канализација и водоводна мрежа во населбата Стаклара.

Овие проекти, изработени за многу кус период од Општина Кисела Вода, претставуваат сумиран одговор на барањата на преку 500 семејства и на, безмалку, сите бизнис ентитети лоцирани во овој дел на градот.

Добрата инфраструктура е една од клучните потреби на секоја компанија за успешно функционирање, а за жителите еден од елементарните услови за достоинствено живеење во 21-от век. Се работи за изградба на две мрежи-водоводна и фекална канализациона мрежа во вкупна должина од 9.2 километри, која ќе чини околу 110 милиони денари. Општината, експресно одговори на потребите на заедницата која повеќе од 50 години се бори со овој проблем, изготвувајќи го проектот кој е од исклучително значење кој ќе има долгорочен позитивен ефект врз економскиот развој на општината.

Сепак, реализацијата значи огромна сума на пари која го надминува финансискиот капацитет на локалната самоуправа, истакна градоначалникот Ѓорѓиевски во своето излагање пред присутните. Оттука, тој ја повика бизнис заедницата на соработка преку нивен придонес во изградбата на водоводната и канализационата мрежа, бидејќи заедничка цел на сите, е постигнување на подобри услови за работа и живеење.

-Децении наназад жителите и вработените во ова место се борат со немањето на вода, проблем кој е резултат на несоодветен водоводен систем, граден од страна на граѓаните пред десетици години, кој никако не може да одговори на потребите на денешницата. Слабиот притисок, а некогаш и целосниот недостиг на вода, во голема мера го отежнува и работењето на компаниите со седиште во Стаклара, на тој начин намалувајќи ја нивната продуктивност и приходите кои би можеле да бидат остварени. Можеби уште поголем проблем е целосниот недостиг од фекална канализациона мрежа, што претставува сериозна закана и за животната средина. Во целост, проектите кои ги изработивме, предвидуваат изградба на две мрежи и водоводна и фекална мрежа во вкупна должина од 9.2 километри. Фекалната канализациона мрежа ќе биде во должина од 5.7 километри, додека водоводната во должина од 3.5 километри. Се работи за проект од исклучително значење кој ќе има долгорочен позитивен ефект врз економскиот развој на општината. Силно верувам дека со соработка и заедничка заложба можеме да го претвориме овој проект во реалност и да им овозможиме на сите нашите граѓани и бизниси да имаат подобри услови за работа и живеење- изјави градоначалникот Ѓорѓиевски, по што следеше презентација на проектот од страна на стручните служби и дебата меѓу стопанствениците околу долгоочекуваниот проект.

По бројните прашања и објаснувања, беше договорена и следна средба на која ќе се утврдат насоките за понатамошна заедничка работа.