Со низа случувања, Општина Кисела Вода денес го одбележува својот 66-ти роденден.
Утринава, во паркот Македонија, свое обраќање имаше градоначалникот Филип Темелковски кој ги поздрави присутните и даде кус осврт на изминатата година. Посебен акцент стави врз Проектот за наградување на талентираните ученици и спортисти од општината, како и на најуспешните наставници, воспитувачи и негуватели.
-Работата на локалната самоуправа е да создаде услови, мотивирачка средина за амбициозните и да им помогне во остварувањето на нивните цели. Токму затоа, Општина Кисела Вода со низа проекти го трасира патот на талентираните и дава свој придонес во одбележувањето на исклучително важната улога на учителот во подигањето на младите личности, во зголемувањето на знаењето и промовирањето на вистинските вредности, во обезбедувањето на квалитетен кадар и подобра иднина за нашата земја-потенцираше градоначалникот Темелковски, кој потоа им ги додели наградите.
Во рамките на свечената прослава, беа доделени Плакети за благодарност на компании, институции и поедници кои во годината што измина многупати ја покажаа својата општествена одговорност и на тој начин дадоа свој придонес во подобрувањето на условите во општина Кисела Вода.
Одбележувањето на 66-тиот роденден продолжи со свечена седница на Советот на Општина Кисела Вода. Кус говор одржа Претседателот на Совет, Дарио Шимиќ. Тој го истакна своето задоволство од 4 годишната активна работа на овој Совет, и големиот број на донесени квалитетни одлуки со кои се подобрува животот на жителите од овој дел на градот.
-Сметам дека треба да бидеме горди на страниците кои ние ги испишавме во историјата на Општина Кисела Вода, подвлече Претседателот Шимиќ, заблагодарувајќи им се на сите советници за посветената работа.
По него, градоначалникот Филип Темелковски даде кус отчет за сработеното во изминатата година, потенцирајќи дека му е драго што на овој ден, Кисела Вода е изменета, урбанизирана, модерна и посакувана локација за живеење. Додаде дека и во изминатата, како и во претходните ри години, се работело интензивно, одговорно и чесно и дека на граѓаните им се оставаат проекти кои се конкретни и опипливи и трајни.
-Впрочем, такви беа нашите ветувања уште на самиот почеток, рече градоначалникот Темелковски, пред да даде детално потсетување на сработеното.
Прославата на 66-тиот роденден на Оштина Кисела Вода продолжува и во попладневните и вечерните часови. Имено, во 18 часот во паркот Македонија започнува хуманитарна Коријада која општината ја организира заедно со здружението на пензионери –Кисела Вода. По презентацијата и продажбата на белите пецива, следува концерт на пензионерите фолклористи од оваа општина.
