Синоќа, со проекцијата на филмот „Три недели потоа“ и врачувањето на наградата „Златна грива“ на турскиот режисер, сценарист, актер и историчар Емин Алпер, во киното „Фросина“ свечено беше отворено 11. издание на Меѓународниот филмски фестивал „Киненова“. На свеченото отворање присуствуваа претседателката на државата Гордана Сиљановска-Давкова, градоначалничката на Општина Кисела Вода, Бети Стаменкоска-Трајкоска, како и бројни актери, режисери, филмски работници и почитувачи на филмската уметност.

Овогодишното издание се одржува под мотото „На прво светло“, а посебен белег на отворањето дадоа учениците од основните училишта од Општина Кисела Вода, кои премиерно ги прикажаа своите кратки филмови изработени низ работилницата „Снимај паметно, остави трага“, под менторство на режисерката Марија Џиџева.

Градоначалничката на Општина Кисела Вода, Бети Стаменкоска-Трајкоска, во своето обраќање ја истакна важноста на поддршката за овие млади автори и визијата на локалната самоуправа за децентрализација на културата:

-Огромна е честа да се стои на оваа сцена вечерва, меѓу толку многу истакнати имиња од седмата уметност, докажани филмски работници и искрени вљубеници во филмот. Но, да се застане овде веднаш по овие млади луѓе, основците од Кисела Вода, и нивните филмски приказни, претставува чин на длабока интроспекција за сите нас. Низ нивните објективи, вечерва видовме како дигиталната ера, која често отуѓува и создава простор за врсничко насилство, може да се трансформира во моќна алатка за обединување, емпатија и разбирање. За нас, како локална самоуправа, поддршката на културата не е само декларативна заложба, туку стратешки влог во развојот на општеството. Длабоко верувам дека уметноста треба слободно да патува и да биде широко достапна за секој граѓанин. Преку кино-салите коишто низ соработката со “Киноверзум” ги отворивме во Општина Кисела Вода, се стремиме да ја претвориме општината во вистинско културно средиште кое ширум ги отвора вратите и ги обединува вљубениците во филмот од целиот град, во случајов и од целата држава и пошироко, нудејќи им можност да проследат една внимателно селектирана, квалитетна програма- истакна Стаменкоска-Трајкоска.

Официјална поддршка за фестивалот и за трудот на учениците упати и претседателката Гордана Сиљановска-Давкова, која во своето обраќање истакна:

-„Киненова” и годинава ги обединува различните кинематографски традиции и авторски поетики, преку повеќе од 35 наслови што ја потврдуваат разновидноста на филмскиот израз и ја афирмираат седмата уметност како неисцрпно поле на творечка слобода, естетско истражување и интелектуална провокација. Во филмските првенци на дванаесетте ученици од Кисела Вода, препознавам ветувачки потенцијал и љубопитност на една млада генерација којашто преку објективот трага по одговори и ги одгатнува појавите на врсничкото насилство и дилемите на младите во дигиталниот свет.

На годинешниот лауреат Емин Алпер му беше врачена наградата „Златна грива“ за особен придонес во светската филмска уметност. Примајќи го признанието, тој истакна:

-За мене, филмот отсекогаш бил начин да се разберат луѓето, нивните стравови, нивните желби и општествата во кои живееме. Тој не може само да го промени светот. Но, може да нè натера да го гледаме светот поинаку. Може да им даде глас на оние кои се игнорирани, да ги предизвика моќните и да нè потсети дека секогаш постои друг начин на гледање на работите-истакна Емин Алпер.

Директорот на „Киненова“, Небојша Јовановиќ, потенцираше дека ова е најсилната селекција досега.

-Оваа година ве водиме во океанот на светската филмска продукција и ви ги откриваме најновите филмски приказни од различни меридијани. Да го славиме добриот филм и искрените филмски авторски гласови- порача Јовановиќ, по што фестивалот за отворен го прогласи режисерот Мирослав Терзиќ.

По свеченото отворање, од денес, филмските проекции од програмата на 11. издание на „Киненова“ продолжуваат да се прикажуваат во двете кино-сали во Општина Кисела Вода.