Со пригодна свеченост, општина Кисела Вода го одбележа светскиот ден на учителот.
На настанот на кој присуствуваа градоначалникот Билјана Беличанец-Алексиќ, Претседателот на Советот Трајче Донев, советници, директори и наставници од основните училишта на територија на општината и повеќе гости, се проговори за исклучително важната улога на учителите во подигањето на младите личности, во зголемувањето на знаењето и промовирањето на вистинските вредности, во обезбедувањето на квалитетен кадар и подобра иднина за нашата земја.
– Вистинскиот учител знае децата да ги обликува во луѓе на кои останува светот. Знае да ги подготви за она време кое допрва доаѓа, иако тоа за него значи соочување со нови, лични предизвици кои ги носи современото општество-напредокот на технологијата, совладувањето на тековните реформи во образовниот систем, изменетите интереси на денешните ученици.
Свесни сме дека е голема улогата на општината во однос на креирање на современи и модерни услови за изведување на наставата, па така, од своја страна општина Кисела Вода, интензивно работи на подобрување на условите во сите основни училишта на оваа територија. Објектите се реновираат, се применуваат мерки за енергетска ефикасност, се градат и сосема нови училишта. Со еден збор, се обезбедува средина во која наставникот ќе може да им пружи квалитетно образование на учениците, а самиот ќе ужива достоинство во својата професија- истакна во своето обраќање градоначалникот Билјана Беличанец-Алексиќ.
Претседателот на Советот на општина Кисела Вода Трајче Донев додели благодарници за наставниот кадар од сите училишта од овој дел на градот.
Пофалница му беше доделена и на наставникот со најдолго работно искуство, Ристо Дарлев од ООУ Невена Георгиева Дуња.
Денешниот 5-ти октомври е прогласен од УНЕСКО за Меѓународен ден на учителите во 1993 година. Интернационалата за образование, која претставува 29 милиони образовни работници во 166 земји, од 1966 година го празнува Светскиот ден на учителот.
