Капацитетите и можностите за развој на општина Кисела Вода со посебен акцент врз спроведувањето на мерки за енергетска ефикасност, беа во фокусот на денешниот разговор на градоначалникот на општина Кисела Вода, Билјана Беличанец-Алексиќ и делегацијата од Австриската амбасада во Македонија предводена од Герхард Шлатл, раководител на Трговското Одделение на Австриската Амбасада во Македонија.

Посетата на економското аташе на Австрија во Македонија, уследи по доделената награда на престижната фондација Енерџи Глоуб , со седиште во Австрија ,која му беше доделена на советникот за енергетска ефикасност при општина Кисела Вода, Славко Митовски за енергетската обнова на ОУ “Партенија Зографски”. Истата се доделува секоја година за најдобриот еколошки проект, во секоја држава, по што, наградените проекти учествуваат на светското натпреварување.

Честитајќи  и уште еднаш на општина Кисела Вода за интернационалното признание, Шлатл од страна на градоначалникот Билјана Беличанец-Алексиќ, беше запознаен  со капацитетите на општината која е најстарата во Скопје, што оваа награда ја прави уште позначајна.  Заедно со консултантот за енергетска ефикасност при австриската амбасада, Дојчин Смилевски, ги поздравија напорите што Кисела Вода досега ги има направено во поглед на обнова на градинките и училиштата, промената на уличното осветлување и сите други преземени мерки кои штедат енергија, време и ја намалуваат емисијата на штетни гасови во атмосферата. Воедно, компарирајќи ги своите досегашни искуства со другите општини , ги посочија  чекорите кои сметаат дека општината би требало да ги превземе ако се земе во предвид нејзината инфраструктура и  старост.

Посетата заврши со желби за понатамошна соработка и надеж дека енергетската обнова на ОУ Партенија Зографски, покрај наградата на национално ниво, на општина Кисела Вода ќе и донесе и светско признание.