Градоначалникот на Град Скопје, Коце Трајановски, градоначалникот на општината Кисела Вода, Билјана Беличанец – Алексиќ и директорите на јавните градски претпријатија денеска присуствуваа на последниот ден од тридневната акција за чистење на општината Кисела Вода, на улицата Христо Татарчев, во близина на ОУ „Круме Кепески”
Со оваа акција во општината Кисела Вода официјално почна единаесеттиот циклус посети на општините на Град Скопје и средби со претставниците на урбаните и месните заедници.
– Овој циклус посети на скопските општини го почнуваме од општината Кисела Вода. Ова е одлична можност да се сретнеме со претставниците на урбаните и на месните заедници и да ги слушнеме мислењата на граѓаните за проектите на Градот Скопје и нивните потреби од областа на урбаното живеење. Ќе разговараме за прашања од областа на сообраќајот, за новите сообраќајни решенија што минуваат низ општината Кисела Вода, за јавната хигиена и одржувањето на зеленилото, за подобрувањето на услугата на јавните претпријатија и за многу други прашања. Овие средби претставуваат и еден вид отчет на досега сработеното од страна на Град Скопје на подрачјето на општината Кисела Вода. Како и досега, циклусот посети на скопските општини е придружен со голема акција за чистење. Во изминативе три дена на подрачјето на општината Кисела Вода екипите на ЈП „Паркови и зеленило” ги косеа тревниците и ги поткаструваа дрвјата, работниците на ЈП „Улици и патишта” ги крпеа ударните дупки, екипите на ЈП „Водовод и канализација” ја проверуваа атмосферската канализација, а работниците на ЈП „Комунална хигиена” ги расчистуваа дивите депонии, ги чистеа контејнерите и ги метеа улиците. На терен беа присутни и екипи на ЈСП и на ЈП „Градски паркинг” – рече Трајановски.
Градоначалникот на општината Кисела Вода, Билјана Беличанец – Алексиќ изрази задоволство од успешно спроведената акција за чистење на општината и ја нагласи добрата соработка со Градот Скопје.
-Би сакала да им се заблагодарам на градоначалникот на град Скопје, Коце Трајановски, на градската администрација, на директорите на јавните претпријатија кои навистина ревносно си ја сфатија задачата. Имено,ние во понеделникот одржавме еден работен состанок, на кој им ја презентиравме нашата мала студија на теренот, направена во изминатите неколку дена од страна на секторот месни заедници и комуналниот сектор при општина Кисела вода, за што би сакала да им се заблагодарам и ним и на секретарките од месни заедните и урбанитезаедници, бидејќи четири дена беа на терен и ги евидентираа проблемите што ги засегнуваат јавните претпријатија и градот Скопје. На тој начин и ја направивме оваа студија која содржи и фотографии и имиња на улици,точни локации каде се евидентирани проблемите и потоа , таа студија им беше поделена на директорите на јавните претпријатија.
Можам да кажам дека навистина интензивно се работи и убаво би било кога вакви акции би се случувале почесто, но затоа сме тука и ние, како општинска администрација , да потсетуваме и да алармираме онаму каде има потреба да се реагира и итно да се дејствува од страна на јавните претпријатија. Уште еднаш, благодарам на градот Скопје , што токму од општина Кисела Вода ја отпочна оваа активност која има за цел подобрување на условите за живот на жителите на оваа територија и воопшто, на градот Скопје. Убедена сум дека и понатаму интензивно ќе соработувама онака, како што и досега соработувавме-истакна градоначалникот на општина Кисела Вода Билјана Беличанец-Алексиќ.
