Трибина на тема, “Современ училишен спорт”, се одржа денес во Големата сала на општина Кисела Вода. На неа беа презентирани можностите за развој на спортската инфраструктура во образовниот систем, преку создавање на основни услови за успешно функционирање на училишниот спорт.
На трибината говореа директорот на Агенцијата за млади и спорт, Марјан Спасески, директорот на Федерацијата на училишен спорт, проф.Александар Туфекчиоски, Јадранка Ѓорѓиевска од Секторот за основно и средно образование при МОН, претставници од Одделението за спорт на општина Кисела Вода, како и директорите и наставниците по физчко воспитување од училиштата на територија на општина Кисела Вода.
-Заинтересираноста на учениците за училишниот спорт во моментов опфаќа околу 8-10% од вкупниот број на ученици во Република Македонија, а заложбите на Владата на Република Македонија заедно со Агенцијата за млади и спорт, Министерството за Образование и Наука, ЗЕЛС и Федерацијата на училишен спорт, се наредните две години да бидат опфатени со дополнителни спортски активности околу 36% од вкупниот број на ученици-истакна директорот на Агенцијата за млади и спорт, Марјан Спасески. Нагласи дека повратните информации од општините, по предложените насоки доставени до сите градоначалници, говорат дека интересот за формирање на училишни спортски клубови е многу голем, и се очекува покрај досегашните 50-тина, да се формтираат ушто 80 до 100 нови клубови до крајот на 2014.
-Министерството за Образование и Наука ја смета имплементацијата на училишниот спорт во образовниот систем за своја темелна програмска определба со која се нагласува грижата кон младите генерации. Оттука и надежта дека и другите општини ќе ја следат општина Кисела Вода, која е лидер во локално организирање на спортот уште од најмала возраст-изјави Јадранка Ѓорѓиевска од Министерството за Образование и Наука.
Претседателот на Федерацијата на училишен спорт, професорот Александар Туфекчиевски, ја потенцираше одговорноста на директорите и наставниците по физичко воспитување во училиштата за развој на училишниот спорт , во услови кога државата е максимално ангажирана и посветена на обезбедување услови за негов развој. Воедно, додаде дека ова ќе биде одлична можност за вклучување на невработените наставници по физичко воспитување во образовниот процес.
На дебатата се говореше и за можноста за зголемување на бројот на часови по физичко воспитување во редовната настава, улогата на оперативниот менаџмент во образовните установи, можните модели за организирање на училишните спортски клубови , како и за воведувањето физичко воспитување во градинките, како младите уште од најмали нозе би можеле да ги увидат придобивките од занимавањето со спорт.
