Учениците од сите осум основни училишта од општина Кисела Вода заедно со своите наставници во просториите на библиотеката “Јане Сандански”  во општина Аеродром, одржаа средба со македонски автори кои својот творечки опус го посветиле на најмладите – децата.

 Писателите Стојан Тарапуза, Александар Кујунџиски, Велко Неделковски и Горјан Петревски, препознатливи по своите книги кои се задолжителна лектира на секој ученик, литературни дела со животни поуки и искуства, низ разговор ги водеа присутните ученици по вистинскиот пат на создавањето на една убава книга, ги советуваа како успешно се твори, а најмногу ги потттикнуваа многу да се дружат со книгата и уште повеќе да читаат.

Настанот е дел од кампањата “20 Причини да избереш книга и читање” организирана од Градската библиотека “Браќа Миладиновци” која започна во месец февруари во Централната библиотека и се одржуваше еднаш месечно во другите централни библиотеки и библиотечни клонови со цел да се развие свеста кај учениците за читање на македонски автори.

Учениците се претставија со свои литературни дела, писателите рецитираа дел од своите познати песни за деца, а потоа се разви дискусија помеѓу присутните околу инспирацијата да го напишат делото, начинот на создавање на главните ликови и нивниот карактер, автентичноста на приказната,  и начинот на кој се развива талентот за пишување.

Учениците и писателите дефинираа 20 причини зошто да избереш книга и читање како насока во одбирањето на вистинскиот пат на една здрава млада личност.

Дефинираните 20 причини беа запишани и ќе бидат пренесени на рекламен материјал, со кој се заокружува кампањата за популаризација на македонската детска литература, организирана од Градската библиотека во соработка со Министерството за култура.