Градоначалникот на општина Кисела Вода Билјана Беличанец-Алексиќ и Претседателот на Советот на општината Трајче Донев, денес присуствуваа на свеченоста по повод 70 годишнината од постоењето на ООУ “Кирил Пејчиновиќ”

 -Голема чест е да се биде дел од училишниот колектив кој во текот на сите овие години оформи голем број на успешни личности. Сите ние заедно дадовме свој удел во создавањето на препознатливиот идентитет на ова реномирано училиште- изјави пред присутните директорот на на ООУ “Кирил Пејчиновиќ” Сашо Јованоски, искажувајќи голема благодарност на на општина Кисела Вода, на градоначалникот Билјана Беличанец-Алексиќ и на претседателот на Советот на општината Трајче Донев кои, како што истакна, во континуитет инвестираат и превземаат најразлични активности за подобрување на условите во училиштето и осовременување на наставата.

Во име на сите ученици, на сите наставници и целиот персонал на училиштето, тој им врачи благодарници.

Ви посакувам да славите уште многу родендени и уште многу вакви значајни јубилеи-изјави градоначалникот Беличанец-Алексиќ.

Благодарница му беше доделена и на генералниот директор на АД “Цементарница-Усје”, Борис Хрисафов, за неодамнешната донација за реновирање на дел од училиштето, која, преку потпишаниот договор со општината, на учениците им овозможи подобри услови за одвивање на наставата.

Современиот музичко-сценски перформанс кој го изведоа учениците пред публиката, во целост ја изрефлектира урбаната приказна која ја живее јубилејната генерација на ова  училиште. Преку музички времеплов, насловен “Овој свет е мало место убаво”, беа одбележани седумте изминати декади и нивните најголеми музички одбележја. Публиката низ еден романтичен и разигран поглед наназад, се потсети на хитовите од Брилијантин, на АББА, на Мајкл Џексон, на Драган Мијалковски и Тоше Проески… Се играше и на Бијонсе, а за крај и на  песната што е најголем хит во овој период, “Хепи” на Фарел Вилијамс.

Покрај, добро осмислениот музичко-сценски концепт од страна на наставниците и талентот на учениците кои тоа на сцена го донесоа, публиката имаше можност и низ фотографии да се потсети на минатото и на трансформацијата на ликот на овој училишен објект.

ООУ Кирил Пејчиновиќ е формирано во декември 1944 година, непосредно по ослободувањето на градот Скопје. Денес ова училиште брои 830 ученици распоредени во 33 паралелка од I до IX одделение.