Денеска, на Светскиот ден на аутизмот, градоначалничката на Општина Кисела Вода, Бети Стаменкоска Трајкоска, заедно со градоначалникот на Град Скопје, Орце Ѓорѓиевски, и неговата сопруга Мартина, официјално ја отворија првата сензорна соба во детска градинка на територијата на општината. Овој значаен простор за рана инклузија, лоциран во објектот на градинката „8 Март“ во населбата Расадник, е комплетно опремен преку личната донација на семејството Ѓорѓиевски.

Со отворањето на просторијата, градоначалничката Стаменкоска Трајкоска уште еднаш ја потврди заложбата за создавање еднакви услови за сите деца. Сензорната соба обезбедува неопходна поддршка за дечињата со атипичен развој, нудејќи им безбедна и смирувачка средина каде што низ прилагодена игра ќе можат полесно да ги совладуваат секојдневните предизвици.

Денес, на Светскиот ден на аутизмот, со искрена благодарност ја примаме донацијата од градоначалникот на град Скопје, Орце Ѓорѓиевски, и неговата сопруга Мартина, кои обезбедија реквизити за првата сензорна соба во градинка во Општина Кисела Вода, лоцирана во објектот „8 Март“ во населбата Расадник. Гестот претставува значајна поддршка и вистинско олеснување во секојдневието на децата со аутизам. Не постои повистински начин да се одбележи денот од тоа да се вложи во подобрување на условите, поддршката и квалитетот на живот на овие прекрасни деца, во нивниот развој, нивната сигурност и нивната можност слободно да го изразат својот уникатен свет. Преку разновидни сензорни стимули, собата ќе има значајна улога во развојот на когнитивните и социјалните вештини кај децата, како и во поттикнување на нивната самостојност и активно вклучување во општеството. Изразуваме искрена благодарност за нивната хумана мисија, која континуирано ја спроведуваат. Нивната посветеност е пример за вистинска грижа, солидарност и општествена одговорност. Создавањето еднакви услови за сите граѓани, вклучувајќи ги и лицата со попреченост, е од исклучителна важност и сите заедно работиме за исполнување на таа цел-изјави  градоначалничката Бети Стаменкоска Трајкоска, додавајќи дека Општина Кисела Вода веќе има воспоставено ваков стандард во основното образование и дека основните училишта на територијата на Кисела Вода се веќе опремени со сензорни соби.