За 5460 ученици од основните училишта од општина Кисела Вода денес започна новата учебна година. Меѓу нив, 624 првачиња на кои, од страна на градоначалникот Орце Ѓорѓиевски и неговиот тим, им беа поделени ранци и училишен прибор во рамки на проектот “Ранче за секое прваче”.
Градоначалникот Орце Ѓорѓиевски кој присуствуваше на свеченоста по повод првиот училишен ден во ООУ “Кузман Јосифовски Питу” им го честиташе почетокот на првачињата и нивните родители и проговори за активностите кои и годинава ќе се спроведуваат со цел унапредување на наставниот процес. Назначи дека е среќен што во општина Кисела Вода броjот на запишани деца во прво одделение расте и дека како новина, од годинава сите ученици од прво до деветто одделение ќе добијат бесплатни унифицирани училишни униформи.
– Општина Кисела Вода и јас како нејзин градоначалник, секогаш ја потенцираме важноста на образованието и постојано работиме на унапредување на условите во нашите училишта. И оваа година, продолжуваме со успешниот проект “Ранче за секое прваче”, кој лани за првпат стартуваше од Општина Кисела Вода, а го имплементираа и многу други општини кои ја увидоа неговата вредност. Годинава сите 624 ученици запишани во прво одделение од нас, како локална самоуправа добиваат училишен ранец со прибор што значи дека сите тие имаат еднакви можности за почеток на учебната година. Првиот училишен ден треба да биде радост за сите деца и за нивните родители и не смееме да дозволиме тие да бидат оптоварени со финансиски грижи.
Дополнително, сакам да промовирам уште еден проект кој ќе стартува од тука, од Општина Кисела Вода. Имено, од оваа учебна година, за околу еден месец, сите ученици од прво до деветто одделение, ќе добијат бесплатни униформи. Ова значи дека во услови на се поголема финансиска криза и се поизразени социоекономски разлики помеѓу нашите граѓани, обезбедуваме можност за време на наставата сите ученици да се чувствуваат удобно во своето опкружување, и нивните мисли, каква и да им е домашата финансиска состојба, да бидат насочени само кон стекнување на што поголеми знаења и пријателства-истакна градоначалникот Орце Ѓорѓиевски.
Инаку летово беа отпочнати, а дел и завршени, голем број на инфраструктурни проекти низ училиштата во општина Кисела Вода. Во ООУ “Партенија Зографски” е во тек темелна реконструкција на кошаркарското и повеќенаменското игралиште. Во овој училишен објект беа обновени и три училници кои претходно беа во лоша состојба, а ќе биде изграден и голем паркинг простор. Се градат две училници во ООУ “Кузман Шапкарев”. Во завршна фаза е изградбата на трпезарија во ПОУ “Кузман Јосифовски Питу” во Црниче. Во “Кузман Јосифовски Питу” беше обновен подот во една училница. Во постапка е изградба на спортска сала во ООУ “Рајко Жинзифов” во Пинтија.Како што назначи градоначникот Ѓорѓиевски, проектите за подобрување на образованието во општина Кисела Вода ќе се одвиваат со засилена динамика во претстојнииот период.
Дополнително, тој ги покани сите ученици и нивнитe семејства да бидат дел од вечерашниот музички хепенинг кој во чест на првиот училишен ден ќе се одвива во Паркот на бранителите во населбата Драчево. Од 19 часот, концерт насловен „Музички волшепства“, ќе одржат популарните „Триангл Пулс“ на кои со ритмички тoчки ќе им се придружат и ученици од ООУ„Климент Охридски“, ООУ„ Рајко Жинзифов“ и ООУ„Кузман Шапкарев.
