Градоначалникот на општина Кисела Вода Билјана Беличанец-Алексиќ, денеска, во Големата сала на општината, додели 41 ваучер на семејствата со принова. Со денешниот настан, бројот на родители кои досега добија еднократна парична помош од општината се искачи на 577.
Ветувајќи им на присутните дека напорите што оваа локална самоуправа ги прави за да ги обезбеди најдобрите можни услови за раст и развој на новите жители на општината ќе продолжат со засилена динамика, градоначалникот Билјана Беличанец-Алексиќ истакна дека овој проект ќе продолжи и понатаму.
-Се надеваме дека и со оваа скромна помош од 6000 денари која денеска ја доделуваме за 41то новороденче, од кои 24 се машки, а 17 женски, ќе Ви излеземе во пресрет за оние први потреби кои доаѓаат заедно со новороденчето. Воедно, би сакала да потенцирам дека овој проект кој е дел од Програмата од социјалната сфера на општина Кисела Вода ќе продолжи и ќе се запази се до истекот на мојот мандат-нагласи Беличанец-Алексиќ.
Критериумите кои се потребни за добивање на еднократна парична помош на семејствата со принова се следните: и двата родитела да се со живеалиште на територијата на општината Кисела Вода и заедно со барањето да достават на увид и важечки лични карти или други исправи за лична идентификација (една во случај на самохран родител), извод од матична книга на родените за новороденчето, како и фотокопија од трансакциона сметка. Рокот за поднесување на барањата е 90 дена, од моментот на раѓање на детето.
