Деловен појадок со бизнис заедницата се одржа денес во организација на градоначалникот на Општина Кисела Вода, Филип Темелковски. Во присуство на градоначалникот, директорот на агенцијата за млади и спорт Дарко Каевски, претставници од бизнис секторот чија дејност е регистрирана во општина Кисела Вода, претставници од повеќе сектори од локалната самоуправа, беа отворени најзначајните економски прашања кои имаат за цел да го подобрат деловното работење во општината.
На заедничка маса, се дискутираше за предизвиците со кои се соочуваат деловните субјекти на територија на Општината, како и за можноста за нивно надминување преку заедничко пронаоѓање на соодветни решенија и подигнувањето на општествената одговорност на компаниите. Градоначалникот Темелковски истакна дека е отворен за соработка и сака да ги слушне барањата, сугестиите и предлозите на бизнис заедницата.
На средбата, директорот на агенцијата за млади и спорт Дарко Каевски промовираше една од мерките која има за цел да ги помогне клубовите, спортските федерации, но и индивидуалните спортисти. Имено, спортистите од Агенцијата за млади и спорт и Владата на РМ ќе добијат ваучери кои можат да ги депонираат во деловните компании и за нив да добијат финансиски средства, а пак компаниите кои ги пласирале ваучерите за нив, на крајот од годината ќе добијат даночно ослободување во висина од 40%. Со oваа мерка, Владата и АМС сметаат дека дека ќе се обезбеди дополнителен прилив на средства кои ќе значат директна финансиска инјекција за спортистите и помалите, локални клубови и ќе обезбедат неговото издигнување на повисоко ниво.
Градоначалникот Филип Темелковски истакна дека локалната самоуправа треба да биде мостот помеѓу централната власт и граѓаните и компаниите. Во насока на подобрување на деловното опкружување, најави дека се планира формирање на совет на стопанственици, кој ќе обезбеди развој, подобрување на бизнис климата, како и отворање нови работни места и поквалитетен живот на сите граѓани на Општина Кисела Вода. Најави детални анализи за утврдување на дефицитарните профили на пазарот на трудот и отворање на работилници за дообучување на невработените лица по месните заедници, за нивно полесно снаоѓање на пазарот на трудот и намалување на невработеноста.
