Денеска во основното училиште “Круме Кепески” во Општина Кисела Вода се означи почетокот на големата еколошка акција за почиста околина и за подобрување на хигиенските услови во училиштата, која ја организираат компанијата Пакомак, општината Кисела Вода и радиото Бубамара.
Еколошката акција ќе опфати 25 основни училишта во три скопски општини, а целта е да се активираат децата заедно со нивните семејства да го селектираат отпадот од најмала возраст и да се едуцираат за важноста од селекцијата на отпадот и рециклирањето.
За оваа цел, Пакомак во секое училиште постави потребна количина на наменски контејнери и жолти канти , што учениците во одредени денови ќе ги полнат со амбалажен отпад од пластика – исклучиво со пластични шишиња од вода, сокови, јогурт, пиво, оцет и од масло. За собраниот амбалажен отпад од пластика, Пакомак ќе возврати со хигиенски средства, кои до сега беа на трошок на училиштата и родителите. Училиштето што ќе собере најмногу отпад, ќе добие и дополнителни награди.
„Пакомак“ уште од првиот ден на својата работа има за цел да ја подигне општата еколошка свест кај граѓаните, особено за потребата од селектирано собирање на амбалажниот отпад и негово рециклирање, бидејќи така се штедат природните ресурси кои се ограничени. Со овој проект успеавме да го поврземе целиот ланец за успешно собирање на отпадот, од кој сите имаме придобивка: природата, училиштето и граѓаните. Обично родителите влијаат и ги образуваат децата, но ние очекуваме и веруваме дека овој пат учениците ќе бидат оние кои ќе влијаат врз еколошката свест на своите родители” – изјави Филип Ивановски, главен извршен директор на Пакомак
„ – За кратко време собравме преку 800 кг пластичен отпад. Среќни сме што Еколошката акција е одлично прифатена од страна на учениците и нивните семејства. Нашето училиште, со оваа акција ќе успее да ја зголеми хигиената во училиштето на највисоко ниво, родителите се презадоволни , но сепак најголемата придобивка е што оваа генерација ќе добие почиста општина, почист воздух, поздрава храна и почисто училиште”, изјави Павлина Трајковска – директор на основното училиште Круме Кепески од Кисела Вода.
Поддршка на проектот даде и градоначалникот на Општина Кисела Вода, Марјан Ѓорчев, кој во текот на претходниот ден изврши обиколка на сите осум основни училишта и утврди како тече процесот на имплементација на овој голем еколошки проект.
„ -На овој начин создаваме нови еколошки, едуцирани генерации, успеавме да поврземе 20.000 домаќинства да го селектираат отпадот и според нашите предвидувања во текот на наредната година сите заедно ќе успееме да му го најдеме вистинското место на околу 50 тони пластичен отпад, кој како илустација, ако не се селектира, во некоја депонија ќе зафати простор во висина од 20 катна зграда и таму би останал да скапува 500 години. Ние такво ропство на пластичната амбалажа не и дозволуваме – изјави иницијаторот Ранко Петровиќ од Радио БУБАМАРА .
Покрај еколошките придобивки, на самиот почеток со средствата од собраниот отпад , училиштата добиваат професионални апарати и неограничени количини течен сапун – до секоја чешма во училиштата.
