Три нови урбани заедници посетија вчера градоначалникот на општина Кисела Вода Билјана Беличанец-Алексиќ, претседателот на Советот Трајче Донев, тимот од стручните служби од општината и градот и неколку други институции кои имаат надлежност да ги решаваат најчестите проблеми на граѓаните од локално значење.
Жителите на Бирарија, Цветан Димов и Усје со нив имаа можност да подискутираат за своите потреби, проблемите што ги засегаат и чие решение треба да им ги подобри условите во кои секојдневно живеат.
Изградбата на атмосферската канализација на улиците “Боро Камчевски” и “Фредерик Шопен”, поставувањето на улично осветлување во населбата Бирарија, беа проектите за кои локалните жители беа многу задоволни и благодарни. Ним им беше најавено дека на споменатите улици, ќе се изврши асфалтирање на делот каде се вршени градежни активности. А тековните активности во поглед на санација и крпење на ударните дупки, ќе опфатат и неколку други улици од овој дел на општината. Воедно поставуваето на уличното осветлување ќе продолжи и во наредниот период.
Пред граѓаните од урбаната задница Цветан Димов, градоначалникот Беличанец-Алексиќ ги истакна приоритетните проекти кои се планирани за изведба во овој дел од Кисела Вода. Имено улиците “Мишко Михајловски”, “Марко Цепенков” и улицата “354” ќe бидат целосно реконструирани преку соработката со Агенцијата за државни патишта, а најави и реконструкција на игралиштето “Лабус”.
Во Усје, согласно барањата и потребите на жителите, ќе се врши санација на улиците и крпење на ударните дупки, а ќе бидат поставени и нови линии за улично осветлување. Градоначалникот на општина Кисела Вода Беличанец-Алексиќ, презентираји го досега сработеното во Усје, го издвои новиот подобрен лик на поранешното подрачно училиште “Невена Георгиева-Дуња”. Имено, овој објект неодамна беше реновиран и во него сега функционира првиот приватен Дневен центар за деца со посебни потреби во овој дел од градот “Св. Кирил”. Најави и асфалтирање на улиците “5”, “26” и “1” и потсети дека проблемот со фекалните отпадни води наскоро ќе биде решен со завршувањето на изградбата на модерен колекторски систем за фекални отпадни води кој е во тек и е заеднички проект на Минстерството за транспорт и врски, градот Скопје и општините Кисела Вода, Аеродром и Сопиште.
Редовната посета на месните и урбани заедници во општина Кисела Вода од страна на градоначалникот и претставниците на надлежните институции, ја подобрува комуникацијата меѓу жителите и локалната самоуправа и придонесува за побрзо справување со предизвиците кои ги носи секојдневието. Токму затоа, истата продолжуваат и во наредниот период. Следните средби се со граѓаните од Црниче и Пржино.
