За својот 60ти роденден, општина Кисела Вода доби нови општински симболи. Во рамки на празничните случувања во текот на вчерашниот ден, нив ги промовираа градоначалникот Билјана Беличанец-Алексиќ и Претседателот на Советот Трајче Донев.
Новоизбраните идејни решенија за грб и знаме на општина кои ги изгласа Советот на општина Кисела Вода, со 19 гласа ЗА и еден воздржан, претходно беа избрани на јавен конкурс од страна на жири комисија составена од членови на Советот, а во која беше вклучен и претставник од здружението на хералдичари.
Истите, покрај тоа што во себе ја интегрираат и денешницата- географските, стопанските, природните карактеристика на општина Кисела Вода во денешните граници, во себе ја содржат и нејзината историја. Минималистички се дизајнирани со комбинација на на едноставни елементи кои ја симболизираат општината и нејзината територија – штит, црква, сонце, планина, небо и вода, изведени на начин кој овозможува лесна и едниставна апликација на секаков медиум. Доминатната боја е црвената, содржана во скоро сите елементи од македонското културно наследство во комбинација со бела боја која дава силен контраст и испраќа визуелна порака за чисти, модерни и јасно дефинирани форми кои ја потврдуваат основната идеја- графичко и визуелно дефинирање симболи на цврст, јасно дефниран субјект.
Во текот на вчерашната свечена седница на Советот, одржана по повод 60-годишниот јубилеј, на креаторот на идејното решение – Ласко Џуровски, му беше врачена благодарница, но и паричната награда предвидена од страна на Советот на Кисела Вода, која изнесува вкупно 50.000,00 денари, односно поединечно за секој симбол по 25.000,00 денари.
