13000 жители на општина Кисела Вода ќе го решат деценискиот проблем со непостоење на фекална канализација, како дел од реализацијата на проектот “Изградба на фекална канализација во населено место Сопиште и локалитетот “Сончев град“ и одведување кон постоечките канализациони мрежи во Општина Кисела Вода и Општина Аеродрoм“ . Ова на прес конференција го објавија градоначалникот на општина Кисела Вода , Билјана Беличанец-Алексиќ заедно со Министерот за транспорт и врски Миле Јанакиески, градоначалникот на Скопје, Коце Трајановски, градоначалникот на општина Сопиште Стефче Трпковски, како и директорот на ЈП „Водовод“, Бојан Василевски.
-Првата делница е со вкупна должина од околу 3,8 км. Тргнува од населеното место Сопиште, поминува низ населба Припор, по улицата „Христо Татарчев“, во општина Кисела Вода и завршува кај ницата бул „Србија“ со ул. „Борис Трајковски“. Втората е со вкупна должина од околу 7,0 км и води од населеното место Сопиште, поминувајќи преку регионалниот пат Р 302 и низ населено место Усје покрај Усјанскиот канал се врзува на постоечки коелктор на ул. “Никола Божинов” кој води кон препумпна станица во Аеродром- информираше Министерот Јанакиески.
Во Буџетот на Република Македонија (Министерство за транспорт и врски и Агенција за финансиска поддршка во земјоделството и руралниот развој на РМ) за буџетските 2015, 2016 и 2017 година за реализација на овој проект планирани се средства во висина од 306.007.218 денари.
-Денешниот ден е голем за жителите на Припор и Усје, Пинтија, Стаклара и Градинар. Градењето на канализациската мрежа во овој дел на градот ќе одговори на потребите и барањата на околу 13 000 жители на општина Кисела Вода , значително ќе им го подобри и осовремени секојдневното живеење, што би значело дека септичките јами кои сега се користат, ќе станат минато, што секако, ќе придонесе за зачувување на животната средина и ќе придонесе во понатамошниот развој на општината . По завршувањето на примарната канализациона мрежа, на овој капитален проект на Министерството за транспорт и врски и градот Скопје, ќе се приклучи и општина Кисела Вода, преку изградба на секундарната канализациона мрежа-истакна градоначалникот на општина Кисела Вода, Билјана Беличанец-Алексиќ .
Потенцираше дека само со заедничкиот пристап и добра соработка меѓу институциите успешно се решаваат долгогодишните проблеми на граѓаните.
