По повод одбележување на Детската недела, денеска во основното училиште „Св. Климент Охридски“ во село Драчево беа реализирани повеќе активности меѓу кои и пригодна приредба за прием на првачињата во Детската организација.

На свеченоста присуствуваше и градоначалникот на Општина Кисела Вода, Билјана Беличанец – Алексиќ, која ги поздрави учениците и воспитно-образовниот кадар и им додели училишен прибор и пригодни подароци за првачињата.

-“Вложувањето во децата е вложување во иднината – ова е чест слоган на Обединетите Нации, кој се однесува на детската популација. Сите деца имаат право да живеат во демократско и хумано општество, во кое постојат услови младите од сите возрасти, па и оние најмалите, добро да се подготват за предизвиците и промените со кои ќе се судрат во утрешнината која доаѓа” – кажа во обраќањето градоначалникот Беличанец – Алексиќ.

Таа порача дека Општина Кисела Вода е цврсто определена да ги следи препораките за креирање на свет по мерка на детето.

-“Деновиве, кога со низа активности ја одбележуваме Светската недела на детето, не смееме да заборавиме дека училиштето е нивниот втор дом. Патот до успехот е безусловно зависен и од квалитетното школување.” – им порача Беличанец – Алексиќ на наставниците.  

Градоначалникот се обрати и до децата посакувајќи им успешни училишни и безгрижни детски денови.

-“Драги деца, ви посакувам на вашиот животен пат, полека но сигурно, да се стекнете со мудроста од која ова општество ќе биде уште подобро и поубаво место за живеење. Ви се обраќам денеска и како родител со пораката дека Вие сте нашето најголемо богатство. Минувајте го слободното време во дружење, спортување и учење, бидејќи моќта е во знаењето. Сакајте ги своите родители, сакајте го своето семејство и почитувајте ги најблиските. Само така, Вашите родители ќе бидат горди на Вас, а покрај нив и ние како општина” – заврши таа.

Првачињата ја положија свечената заклетва и со читање на детските права свечено беа примени во Детската организација.

Градоначалникот Беличанец – Алексиќ ја посети и стакленичката градина на ова основно училиште, а заедно со учениците засади и цвеќиња во дворот на училиштето.

Ианку, активности за одбележување на Детската недела се реализираа во сите 8 основни училишта во општината Кисела Вода.