Градоначалникот Орце Ѓорѓиевски и Министерката за труд и социјална политика, Јованка Тренчевска денес ја ставија во функција новата детска градинка ,,Пеперутка 3” во населбата Драчево.
Изградена е во рамки на Проектот за подобрување на социјалните услуги на Министерството за труд и социјална политика и обезбедува згрижување на 110 дечиња од предучилишна возраст. Новоизградената градинка „Пеперутка 3“, под управа на ЈОУДГ „8. Март“, обезбедува високи нормативи на просторните услови за престој на дечињата прилагодени на нивната возраст, како и имплементација на современи методи за предучилишно образование кои овозможуваат правилен детски развој и реализација на концептот – учење преку игра.
-Со големо задоволство денес сме во новата детскa градинка во населбата Драчево, “Пеперутка 3,” каде ќе бидат згрижени околу стотина дечиња, пред се’, од овој дел на општината. Свесни дека раниот детски развој е многу важен, како локална самоуправа се грижиме да ги обезбедиме сите услови за правилен понатамошен развој на секое дете. Инвестираме во унапредувањето на условите во постоечките градинки, но со засилено темпо работиме и на зголемувањето на опфатот на деца во процесот на предучилишно воспитание и образование.
Покрај ставањето во функција на градинката “Пеперутка 3”, која беше изградена пред речиси две години, но дури сега беа надминати администативните бариери за нејзино отворање, Општина Кисела Вода интензивно работи на изградба на нови градинки и проширување на капацитетите на постојните објекти. Во финална фаза сме на подготовка на објектот во кој ќе биде отворена првата градинка во Усје. Тука ќе бидат згрижени околу 100 дечиња од населбите Усје, Стаклара и Градинар. Работиме на проширување на капацитетот на градинката “Ѓурѓица” во Пинтија. Веќе е започнато реновирањето и на објектот “Кокиче”, каде ќе може да примиме нови 150 дечиња, а ќе потсетам дека веќе го проширивме капацитетот и на објектот “Синоличка” од ЈДГ “Весели Цветови”. Исто така, како Општина имаме подготвен проект за целосно нова градинка во Расадник и во моментов работиме на финансиската конструкција, односно на начинот на финансирање за нејзината иградба. Со тој проект, на среден рок го решаваме прашањето за предучилишната инфраструктура. Илустративно, објектот во кој сме денес, кој може да прими 100 деца, а во моментов на листите на чекање во трите објекти во Драчево има околу 30 деца, изјави градоначалникот Ѓорѓиевски, заблагодарувајќи се за соработката на Министерката Јована Тренчевска и Министерството за труд и социјална политика и притоа потенцирајќи дека проектите како овој се голем влог во формирањето на здрави и образовани индивидуи кои во иднина ќе дадат свој придонес за надградба на државата и дека тоа е заедничка одговорност и благородна цел кон која сите треба да се движиме.
-Навистина сум горда што со овој целосно нов објект го решаваме горливиот проблем на родителите од населбата Драчево за згрижување на децата и тоа во најсовремени услови кои обезбедуваат правилен ран детски развој. Тоа е и доказ дека како Влада и како министерство сме целосно посветени на мисијата да ги пресретнеме потребите на граѓаните за поголем пристап до социјалните услуги и за поквалитетен живот. Заложбата на Министерството е контиунирано вложување во изградба на нови современи енергетски ефикасни капацитети за згрижување на децата, како и квалитетен ран детски развој. Заедно со петте градинки од овој Проект, кои веќе работат, од 2017-та година досега се изградени 71 градинка, што е вистинска придобивка за граѓаните. Исто така, сакам да потенцирам дека покрај инфраструктурното вложување, Министерството е посветено и на унапредување на капацитетите на воспитно-образовниот кадар во градинките со цел подигнување на квалитетот на раниот детски развој“, истакна министерката Тренчевска.
Изградбата на градинката е во вредност од 38,8 милиони денари и дополнителни 4,3 милиони денари за ентериерното уредување. Објектот на градинката „Пеперутка 3“ во Драчево се вбројува меѓу објектите со високи перформанси и поседува фасада која има функција на прочистувач, зафаќајќи ги штетните честички од амбиенталниот воздух кои потоа се отстрануваат преку дождови. Новата градинка е и енергетски ефикасна, што е од големо значење при финансирањето на нејзиното редовно функционирање од страна на општината.
